پہلگام دہشت گردانہ حملہ: اپوزیشن نے مذمت کی، چھتیس گڑھ بی جے پی کے ٹوئٹ کو اکھلیش نے غیر حساس قرار دیا

ملک کی تمام سیاسی جماعتوں نے پہلگام دہشت گردانہ حملے کی مذمت کرتے ہوئے ذمہ دار لوگوں کے خلاف سخت کارروائی کرنے کی با ت کہی۔ اس دوران وزیر داخلہ امت شاہ سری نگر پہنچ چکے ہیں اور وزیر اعظم مودی بھی بیرون ملک سے دہلی واپس آ گئے ہیں۔

ملک کی تمام سیاسی جماعتوں نے پہلگام دہشت گردانہ حملے کی مذمت کرتے ہوئے ذمہ دار لوگوں کے خلاف سخت کارروائی کرنے کی با ت کہی۔ اس دوران وزیر داخلہ امت شاہ سری نگر پہنچ چکے ہیں اور وزیر اعظم مودی بھی بیرون ملک سے دہلی واپس آ گئے ہیں۔

نئی دہلی:جموں و کشمیر کے پہلگام میں منگل (22 اپریل) کو ہوئے دہشت گردانہ حملے میں اب تک 26 لوگوں کی موت کی تصدیق ہوئی ہے، جن میں دو غیر ملکی شہری بھی شامل ہیں۔ اس حملے میں کئی دیگر زخمی ہوئے ہیں، جن میں سے بعض کی حالت تشویشناک ہے۔

وزیر اعلیٰ عمر عبداللہ نے بھی اس واقعہ پر افسوس کا اظہار کیا اور اسے حالیہ برسوں میں عام شہریوں کو نشانہ بنانے والا ایک بڑا حملہ قرار دیا۔

انہوں نے سوشل میڈیا پلیٹ فارم ایکس  پر لکھا،’میں بالکل حیران ہوں۔سیاحوں  پر یہ حملہ ایک گھنونا فعل ہے۔’

انھوں نے لکھا،’ہلاکتوں کی تعداد کا ابھی تک پتہ لگایا جا رہا ہے۔ میں اس وقت تفصیلات میں نہیں جا رہا ہوں۔ صورتحال واضح ہوتے ہی اس کا باضابطہ اعلان کیا جائے گا۔ یہ بتانے کی ضرورت نہیں کہ حالیہ دنوں میں عام شہریوں پر یہ سب سے بڑا حملہ ہے۔’

وہیں، جموں و کشمیر کی مرکزی اپوزیشن پارٹی پی ڈی پی کی سربراہ محبوبہ مفتی نے حملے کی مذمت کرتے ہوئے ایکس پر لکھا، ‘میں پہلگام میں اس بزدلانہ دہشت گردانہ حملے کی شدید مذمت کرتی ہوں۔ اس قسم کا تشدد قطعی طور پر ناقابل قبول ہے۔ تاریخی طور پر کشمیر نے سیاحوں کا پرتپاک استقبال کیا ہے۔ اس لیے حملے کایہ  واقعہ انتہائی تشویشناک ہے۔’

اس واقعے کی مذمت کرتے ہوئے لوک سبھا میں قائد حزب اختلاف راہل گاندھی نے سوشل میڈیا پلیٹ فارم ایکس  پر لکھا، ‘جموں و کشمیر کے پہلگام میں بزدلانہ دہشت گردانہ حملے میں سیاحوں کے مارے جانے اور کئی لوگوں کے زخمی ہونے کی خبر انتہائی قابل مذمت اور دل دہلا دینے والی ہے۔’

راہل گاندھی نے کہا، ‘پہلگام میں دہشت گردانہ حملے کے بارے میں امت شاہ جی، عمر عبداللہ جی اور طارق  جی  سے بات کی۔ انہوں نے مجھے تازہ ترین صورتحال سے آگاہ کیا۔ متاثرہ خاندانوں کو انصاف ملنا چاہیے۔ ہم حکومت کے ساتھ ہیں۔’

راجیہ سبھا میں اپوزیشن کے ڈپٹی لیڈر پرمود تیواری نے کہا کہ وادی کشمیر میں سیاحوں پر اس دہشت گردانہ حملے کو کسی بھی قیمت پر برداشت نہیں کیا جانا چاہیے۔ وادی کشمیر کی پہچان امن وامان  ہے۔ یہ حملہ کشمیریت کے خلاف ہے۔ مرکزی حکومت کو اس دہشت گردانہ حملے کی پوری اخلاقی ذمہ داری قبول کرنی چاہیے۔

ہندوستان کے دورے پر آئے امریکہ کے نائب صدر جے ڈی وینس نےاس حملے میں مارے گئے لوگوں کے تئیں تعزیت کا اظہار کیا ہے۔

انہوں نے ایکس  پر لکھا، ‘اوشا (وینس کی اہلیہ) اور میری طرف سے، پہلگام میں اس تباہ کن حملے میں اپنی جان گنوانے والوں کو خراج عقیدت۔ اپنے دورے کے دوران ہم اس ملک اور اس کے لوگوں کی خوبصورتی سے متاثر ہوئے۔ ہم دل و دماغ کے ساتھ ان لوگوں کے ساتھ ہیں جو اس واقعے پر سوگوار ہیں۔’

بہوجن سماج پارٹی کی سپریمو مایاوتی نے ایکس  پر پوسٹ کرتے ہوئے کہا کہ جموں و کشمیر کے سیاحتی مقام پہلگام میں سیاحوں پر دہشت گردانہ حملے میں کئی لوگوں کے ہلاک اور زخمی ہونے کا واقعہ انتہائی افسوسناک، قابل مذمت اور تشویشناک ہے۔ میں سوگوار خاندانوں کے تئیں گہری تعزیت کرتی  ہوں۔ حکومت اس واقعہ کو سنجیدگی سے لے کر سخت کارروائی کرے۔

دریں اثنا، بھارتیہ جنتا پارٹی کی چھتیس گڑھ یونٹ نے اپنے سوشل میڈیا ہینڈل پر پہلگام دہشت گردانہ حملے سے متعلق ایک پوسٹر شیئر کیا ہے، جس میں لکھا ہے – ‘دھرم  پوچھا ، ذات نہیں’۔ یاد رکھیں گے۔’

سماج وادی پارٹی کے قومی صدر اکھلیش یادو نے چھتیس گڑھ بی جے پی کے اس ٹوئٹ پر ناراضگی ظاہر کرتے ہوئے کہا، ‘بی جے پی نے جموں و کشمیر کے انتہائی دردناک حادثے پر بچکانہ اشتہار شائع کرکے ثابت کیا ہے کہ بی جے پی والوں کو ان لوگوں سے کوئی ہمدردی نہیں ہے جنہوں نے اپنی جانیں گنوائی ہیں اور جن کے اہل خانہ دکھ کے پہاڑ سے ٹکرا گئے ہیں۔ اگر بی جے پی اس اشتہار کو ہٹا بھی دیتی ہے تو اس کے کٹر حامی بھی اس گناہ کو معاف نہیں کریں گے۔ بی جے پی اپنے اقتدار اور سیاست کے لیے ہمیشہ آفت میں موقع تلاش کرتی ہے۔ بی جے پی اپنے اقتدار کے سوا کسی کی سگی  نہیں ہے۔ ‘ قابل مذمت!’

اس سے پہلے اکھلیش یادو نے کہا تھا، ‘مرکزی حکومت کو جموں و کشمیر میں سلامتی کے ماحول کو ترجیحی سطح پر یقینی بنانے کی ضرورت ہے، تب ہی مقامی باشندوں اور سیاحوں کی زندگیاں محفوظ رہ سکتی ہیں۔ صرف سلامتی ہی اعتماد اور اتحاد اور سالمیت کا احساس پیدا کرتی ہے۔’

دہلی کے سابق وزیر اعلیٰ اور عام آدمی پارٹی کے سربراہ اروند کیجریوال نے ایکس پر لکھا، ‘جموں و کشمیر کے پہلگام میں سیاحوں پر بزدلانہ دہشت گردانہ حملہ انتہائی شرمناک اور قابل مذمت ہے۔ نہتے معصوم لوگوں کو نشانہ بنانا انسانیت پر حملہ ہے۔ اس دکھ کی گھڑی میں پورا ملک متحد ہے۔ ہماری تعزیتیں سوگوار خاندانوں کے ساتھ ہیں اور ہم ہر طرح  کی دہشت گردی کی پرزور مذمت کرتے ہیں۔’

اس سلسلے میں راشٹریہ جنتا دل کے رہنما تیجسوی یادو نے کہا، ‘میں پہلگام میں سیاحوں پر دہشت گردانہ حملے سے صدمے میں ہوں اور غمزدہ ہوں۔ بے گناہ لوگوں پر وحشیانہ حملہ کرنا اور انہیں قتل کرنا ہرگز انسانیت نہیں ہے۔ اس انتہائی تکلیف دہ، اداس، تاریک اور خوفناک وقت میں، ہم سب ہندوستانی متاثرین اور ان کے خاندانوں کے ساتھ یکجہتی کے ساتھ کھڑے ہیں’۔

انہوں نے مزید کہا، ‘کوئی لفظ آپ کے درد کو کم نہیں کرسکتا لیکن ہمارے خیالات، دعائیں اور ہمدردی آپ کے ساتھ ہیں۔ ہمارے معاشرے میں تشدد اور دہشت گردی کی کوئی جگہ نہیں۔ اس گھناؤنے جرم اور وحشیانہ تشدد کے ذمہ دار دہشت گرد تنظیموں اور دہشت گردوں کو قانون کی پوری طاقت استعمال کرتے ہوئے ان کے مذموم اعمال کی سخت ترین سزا دی جانی چاہیے۔ میں حکومت سے مطالبہ کرتا ہوں کہ وہ واضح ٹائم لائن کے ساتھ تیز، شفاف اور مکمل تحقیقات کرے۔’

قابل ذکر ہے کہ منگل کی دوپہر تقریباً 2:50 بجے وادی بیسرن (اپنے گھاس کے میدانوں کے لیے مشہور) میں گولیوں کی آواز سنی گئی۔ پہلگام بس اسٹینڈ سے سات کلومیٹر کے فاصلے پر واقع یہ جگہ ہائیک کرنے والوں اور ایڈونچر پسند کرنے والے سیاحوں کے درمیان مقبول ہے۔

دی ریزسٹنس فرنٹ (ٹی آر ایف) نے پہلگام حملے کی ذمہ داری قبول کی ہے۔ خیال کیا جاتا ہے کہ یہ تنظیم پاکستان میں قائم کالعدم دہشت گرد تنظیم لشکر طیبہ کا حصہ ہے۔ ایک بیان میں تنظیم نے اس حملے کو ہندوستان کے قبضہ والے جموں و کشمیر میں مبینہ ‘ڈیموگرافک تبدیلی’ کا بدلہ قرار دیتے ہوئے اس کا جواز پیش کرنے کی کوشش کی ہے۔ جموں و کشمیر اسمبلی میں حالیہ انکشاف کا حوالہ دیتے ہوئے کہ جموں و کشمیر میں پچھلے دو سالوں میں غیر مقامی لوگوں کو 83742 ڈومیسائل سرٹیفکیٹ جاری کیے گئے ہیں، تنظیم نے کہا کہ وہ (غیر مقامی) ‘سیاحوں کے طور پر آتے ہیں، ڈومیسائل لیتے ہیں اور پھر ایسا برتاؤ کرنا شروع کر دیتے ہیں جیسے وہ زمین کے مالک ہوں۔’

سوشل میڈیا پر گردش کرنے والے ٹی ار ایف کے بیان میں کہا گیا،’اس کے نتیجے میں، (جموں اور کشمیر میں) غیر قانونی طور پر آباد ہونے کی کوشش کرنے والوں کے خلاف تشدد کا ارتکاب کیا جائے گا۔’

دی وائر اس بیان کی صداقت کی تصدیق نہیں کرتا۔

More in Featured :
دہلی کے لیفٹیننٹ گورنر کی جانب سے دائر 24 سال پرانے ہتک عزت معاملے میں میدھا پاٹکر گرفتار
پہلگام دہشت گردانہ حملہ: کشمیریوں نے کہا – سیاحتی صنعت بری طرح متاثر ہوگی
ٹی آر ایف: پہلگام دہشت گردانہ حملے کی ذمہ داری قبول کرنے والی دہشت گرد تنظیم کون ہے؟
پہلگام حملہ: کم از کم دو حملہ آوروں نے غیر مسلموں کو چن کر گولی ماری تھی
ترکیہ کا وقف نظام اور ہندوستانی پارلیامنٹ میں اس کا تذکرہ
پہلگام حملہ: مقامی مہلوک کے اہل خانہ نے کہا – ہم تمام مہلوکین کے لیے سوگوار ہیں

Related News