جموں و کشمیر پولیس نے تین نابالغ لڑکیوں سے اسرائیل مخالف گرافیٹی بنانے پر پوچھ گچھ کرتے ہوئے ان کی کونسلنگ کی تھی۔ سری نگر کے ایم پی آغا روح اللہ مہدی نے لڑکیوں کی حمایت کرتے ہوئے کہا کہ نسل کشی کی مخالفت کرنے والوں کو نہیں، بلکہ انہیں روکنے والوں کو کونسلنگ کی ضرورت ہے۔
السٹریشن: پری پلب چکرورتی/ دی وائر
نئی دہلی: سری نگر کے رکن پارلیامنٹ آغا روح اللہ مہدی نے بدھ کے روز تین نابالغ لڑکیوں کی حمایت میں ایک ریلی نکالی، جن سے پولیس نے مبینہ طور پر اسرائیل مخالف سرگرمیوں کے لیے پوچھ گچھ اور کونسلنگ کی۔
مہدی نے کہا کہ ان لڑکیوں کو سمجھائے جانے کی ضرورت نہیں ہے ، بلکہ ان لوگوں کو ہے جوانہیں دبانے کی کوشش کر رہے ہیں۔
دی ٹیلی گراف کی رپورٹ کے مطابق، منگل کو پولیس نے بتایا کہ انہیں امام باڑہ زادیبل کے مرکزی دروازے کے باہر سڑک پر غیر ملکی پرچم (اسرائیلی) سے مشابہ گرافیٹی پینٹ کیے جانے کی اطلاع ملی تھی۔
ایک بیان میں کہا گیا، ‘فوری کارروائی کرتے ہوئے ایک پولیس ٹیم موقع پر پہنچی اور فرقہ وارانہ ہم آہنگی اور امن عامہ کو برقرار رکھنے کے لیے گرافیٹی کو ہٹا دیا۔’
بعد ازاں تحقیقات میں تین مقامی بچیوں کے ملوث ہونے کا انکشاف ہوا۔ ترجمان نے کہا، ‘ان کی عمر اور واقعے کی حساسیت کو دیکھتے ہوئے ان کے والدین کو پولیس اسٹیشن بلایا گیا اور ان کی موجودگی میں نابالغوں کی کونسلنگ کی گئی۔’ انہوں نے مزید کہا،’انہیں اس طرح کی کارروائیوں کے نتائج اور فرقہ وارانہ ہم آہنگی اور ذمہ دارانہ شہری رویے کو برقرار رکھنے کی ضرورت سے آگاہ کیا گیا ۔’
اس کے خلاف احتجاج کرتے ہوئے مہدی نے ایکس پر لکھا، ‘جب نابالغ لڑکیاں نسل کشی کے خلاف احتجاج کرتی ہیں تو انہیں کونسلنگ کی ضرورت نہیں ہوتی، لیکن جو لوگ انہیں روکنے کی کوشش کرتے ہیں انہیں اس کی ضرورت ہوتی ہے۔ یہاں صرف ہماری، ہم کشمیریوں کی فرقہ وارانہ ہم آہنگی بگڑرہی ہے۔’
دی ہندو کی رپورٹ کے مطابق،اس سے قبل سوموار (23 جون) کو سری نگر شہر کے مضافات میں واقع بلہامہ میں دو مقامی نوجوانوں کو امریکی اور اسرائیلی پرچم آویزاں کرنے پر حراست میں لیا گیا ۔
پولیس ترجمان کا کہنا تھا کہ دونوں نوجوان رات کے وقت غیر ملکی جھنڈے دکھا رہے تھے جو کہ امن و امان کو خراب کرنے کی واضح کوشش تھی۔
