الزام ہے کہ توانائی محکمے میں امپلائز پراویڈنٹ فنڈ کے تقریباً2600 کروڑ روپے کو غلط طریقے سےنجی ادارہ ڈی ایچ ایف ایل میں سرمایہ کاری کی گئی ہے۔ ڈی ایچ ایف ایل کمپنی مبینہ طور پر انڈرورلڈ ڈان داؤد ابراہیم کےمعاون اقبال مرچی سے جڑا ہوا ہے۔
اتر پردیش پاور کارپوریشن لمیٹڈ میں مبینہ پراویڈنٹ فنڈ (پی ایف) گھوٹالہ کے خلاف لکھنؤ میں مظاہرہ کرتے کانگریسی کارکن(فوٹو : پی ٹی آئی)
محکمہ توانائی کے ملازمین کے پی ایف یا پراویڈنٹ فنڈ کی غلط طریقے سے سرمایہ کاری کے معاملے میں اتر پردیش پاور کارپوریشن کے سابق منیجنگ ڈائریکٹر اے پی مشرا کو منگل کو گرفتار کر لیا گیا۔پولس ڈائریکٹر جنرل اوپی سنگھ نے بتایا کہ یہ گرفتاری توانائی محکمے میں امپلائز پراویڈنٹ فنڈ کے تقریباً2600 کروڑ روپے کی غلط طریقے سے نجی ادارہ ڈی ایچ ایف ایل میں سرمایہ کاری کئے جانے کے معاملے میں ہوئی ہے۔ ڈی ایچ ایف ایل کمپنی مبینہ طور پر انڈرورلڈڈان داؤد ابراہیم کے معاون اقبال مرچی سے جڑا ہوا ہے۔
قابل ذکر ہے کہ اتر پردیش پاور کارپوریشن کے ملازمین کا پراویڈنٹ فنڈ کے 2631 کروڑوں روپے کا غیر متعینہ طریقے سے ڈی ایچ ایف ایل میں سرمایہ کاری کئے جانے کے معاملے میں گزشتہ سنیچر کو سی پی ایف ٹرسٹ اور جی پی ایف ٹرسٹ کے اس وقت کے سکریٹری پی کے گپتا اور اس وقت کےڈائریکٹر (مالی) سدھانشو دوویدی کے خلاف معاملہ درج کر ان دونوں کو بھی گرفتار کیاجا چکا ہے۔
حکومت نے معاملے کی سی بی آئی سے تفتیش کرانے کی سفارش کی ہے۔ سی بی آئی کے ذریعے تفتیش اپنے ہاتھ میں لئے جانے سے پہلے معاملے کی تفتیش کرائم برانچ (اکانومک)کو دی گئی ہے۔ وہیں اس معاملے کو لےکر اپوزیشن اب ریاست کی بی جے پی حکومت پر حملہ آورہے۔ سماجوادی پارٹی کے صدر اکھلیش یادو نے کہا کہ اس گھوٹالہ کے لئے صرف ریاست کی بی جے پی حکومت ہی ذمہ دار ہے اور اس کے لئے وزیراعلیٰ یوگی آدتیہ ناتھ کو استعفیٰ دے دینا چاہیے۔
سابق وزیراعلیٰ اکھلیش نے اس گھوٹالہ کا دروازہ اپنی حکومت میں کھولے جانےکے توانائی وزیر شری کانت شرما کے الزام کا جواب دیتے ہوئے پریس کانفرنس میں کہاکہ ایس پی کے دورحکومت میں ملازمین کا پراویڈنٹ فنڈ کے ایک بھی پیسہ کی ڈی ایچ ایف ایل میں سرمایہ کاری نہیں کی گئی۔ انہوں نے کہا کہ جس وقت ڈی ایچ ایف ایل میں پیسہ کی سرمایہ کاری کی گئی اس وقت ریاست میں سماجوادی پارٹی کی حکومت نہیں تھی۔ اس گھوٹالہ کے معاملے میں جومقدمہ درج ہوا ہے اس میں بھی یہی بات لکھی ہے۔ ایس پی حکومت کے وقت میں ایک بھی پیسہ ڈی ایچ ایف ایل کو نہیں دیا گیا۔
ایس پی صدر نے کہا کہ اس گھوٹالہ کے لئے صرف ریاست کی بی جے پی حکومت اور خودوزیراعلیٰ یوگی آدتیہ ناتھ قصوروار ہیں۔ ان کو استعفیٰ دے دینا چاہیے۔ وزیراعلیٰ چاہتے ہوںگے کہ توانائی وزیر شری کانت شرما کو ہٹا دیا جائے، میں اسی لئےوزیراعلیٰ کا استعفیٰ مانگ رہا ہوں۔
انہوں نے کہا کہ ایس پی کی مانگ ہے کہ اس معاملے کی تفتیش سپریم کورٹ یاہائی کورٹ کے کسی جج سے کرائی جائے۔ جب تک یہ تفتیش نہیں ہوگی تب تک سچائی باہر نہیں آ سکتی ہے کیونکہ حکومت نے سچائی کو چھپانے کے لئے جلدبازی میں سی بی آئی تفتیش کی سفارش کی ہے۔ اکھلیش نے اس معاملے میں بجلی محکمے کے تمام ذمہ دار افسروں کے خلاف بھی کارروائی کی مانگ کرتے ہوئے کہا کہ اگر وہ افسر اپنے عہدے پر بیٹھے رہیںگے تو غیرجانبدارانہ تفتیش ممکن نہیں ہے۔
اکھلیش نے دعویٰ کیا کہ یوگی حکومت اپنے اندر چل رہی لڑائی کو چھپاناچاہتی ہے۔ آج اگر حکمراں جماعت کے ایم ایل اے کو کھڑا کرکے پوچھ لیا جائے کہ وہ کس کے ساتھ ہیں تو 300 سے زیادہ ایسے نکلیںگے جو وزیراعلیٰ کو نہیں چاہتے۔
(خبررساں ایجنسی بھاشا کے ان پٹ کے ساتھ) 