دھرمیندر پردھان کا استعفیٰ: سی جے پی بولی – ہم نے کر دکھایا؛ اپوزیشن نے اسے مودی سرکارکی شکست بتایا

مرکزی وزیر تعلیم دھرمیندر پردھان کے استعفیٰ پر ردعمل ظاہر کرتے ہوئے کاکروچ جنتا پارٹی نے کہا کہ جمہوریت میں ڈرنے کی ضرورت نہیں ہے۔ ان کا پہلا مطالبہ پورا ہو گیا ہے، لیکن ابھی دو مطالبے باقی ہیں۔ وہیں دیگر اپوزیشن جماعتوں نے اسے نوجوانوں کی جیت اور مودی حکومت کے غرور کی شکست قرار دیا ہے۔

مرکزی وزیر تعلیم دھرمیندر پردھان کے استعفیٰ پر ردعمل ظاہر کرتے ہوئے کاکروچ جنتا پارٹی نے کہا کہ جمہوریت میں ڈرنے کی ضرورت نہیں ہے۔ ان کا پہلا مطالبہ پورا ہو گیا ہے، لیکن ابھی دو مطالبے باقی ہیں۔ وہیں دیگر اپوزیشن جماعتوں نے اسے نوجوانوں کی جیت اور مودی حکومت کے غرور کی شکست قرار دیا ہے۔

تصویر: پی ٹی آئی

نئی دہلی: ملک کی راجدھانی دہلی سمیت مختلف ریاستوں میں جاری نوجوانوں کے احتجاج کے شدید دباؤ کے درمیان آخرکار مرکزی وزیر تعلیم دھرمیندر پردھان نے استعفیٰ دے دیا ہے۔

اس سلسلے میں دھرمیندر پردھان نے سوشل میڈیا پلیٹ فارم ایکس پر بتایا ہے کہ انہوں نے اپنا استعفیٰ وزیر اعظم کو بھیج دیا ہے، تاہم ان کا استعفیٰ منظور ہونا ابھی باقی ہے۔

اس واقعہ پر ردعمل ظاہر کرتے ہوئے کاکروچ جنتا پارٹی (سی جے پی) کے بانی ابھیجیت دیپکے نے کہا،’ہمیں کاکروچ کہنے کے لیے میں ہندوستان کے چیف جسٹس سوریہ کانت کا شکریہ ادا کرتا ہوں۔ اگر آپ نے ہمیں کاکروچ نہ کہا ہوتا تو دھرمیندر پردھان نے استعفیٰ نہ دیا ہوتا۔‘

ابھیجیت دیپکے نے مزید کہا،’ہم نے کر دکھایا۔ دھرمیندر پردھان نے استعفیٰ دے دیا ہے۔ یہ اس بات کا ثبوت ہے کہ اگر آپ ڈرتے نہیں ہیں، اگر آپ اس حکومت کے سامنے جھکتے نہیں ہیں، تو آپ کسی سے بھی استعفیٰ دلوا سکتے ہیں۔ جمہوریت میں ڈرنے کی ضرورت نہیں ہے۔‘

وہیں، سی جے پی کے ہینڈل سے کیے گئے پوسٹ میں کہا گیا ہے کہ ان کا پہلا مطالبہ، یعنی وزیر تعلیم کا استعفیٰ، پورا ہو گیا ہے، لیکن ابھی دو مطالبے باقی ہیں۔ جن میں خودکشی کرنے والے بچوں کے خاندانوں کو ایک کروڑ روپے کا معاوضہ اور 20 جولائی کو نوجوانوں پر مبینہ تشدد کے لیے پولیس افسران کے خلاف کارروائی شامل ہے۔

اس میں مزید کہا گیا،’ہم ایسے جانے والے نہیں ہیں، یاد رکھیے، کاکروچ سے پنگا مت لیجیے۔‘

وہیں، پیپر لیک معاملے کو لے کر 26 دن تک بھوک ہڑتال کرنے والے سماجی کارکن سونم وانگچک نے دھرمیندر پردھان کے استعفیٰ کو جمہوریت کی جیت قرار دیا ہے۔

انہوں نے ایکس پر لکھا،’یہ جمہوریت کی جیت ہے، جمہوریت کی جیت، جو براہ راست سڑکوں سے آئی ہے۔ یہ امن، صبر اور عزم کی جیت ہے۔ کاکروچ جنتا پارٹی (سی جے پی) اور ملک کی ’جین زی‘ کو مبارکباد۔ ساتھ ہی ان تمام شہریوں کا بھی شکریہ جنہوں نےڈر اور ڈر کے ڈرکو چھوڑ کر ملک کے ہر کونے سے آواز اٹھائی۔‘

انہوں نے آخر میں لکھا،’جوابدہی سے اب اصلاح کی طرف۔‘

معلوم ہو کہ مرکزی حکومت نہ صرف جنتر منتر اور ملک کے دیگر شہروں میں نوجوانوں کی تحریک کے باعث دباؤ میں تھی، بلکہ پارلیامنٹ کے اندر اور باہر بھی اپوزیشن جماعتیں وزیرتعلیم کے استعفیٰ کے لیے حکومت پر دباؤ ڈال رہی تھیں۔

اپوزیشن نے کہا -جین زی کی جیت

دھرمیندر پردھان کے استعفیٰ پر کانگریس نے کہا کہ یہ نوجوانوں کی جیت ہے،ہندوستان کے جین زی کی جیت ہے۔ یہ جیت ان کروڑوں نوجوانوں کی ہے، جنہوں نے ملک بھر میں تعلیمی نظام کو بہتر بنانے کے لیے آواز بلند کی۔ نوجوانوں کی سچائی کے سامنے نریندر مودی کا غرور ٹوٹ گیا ہے اور ان کے جھوٹ کی شکست ہوئی ہے۔

کانگریس کے قومی صدر ملیکارجن کھڑگے نے کہا کہ ہندوستان کے’طلبہ کی گونج‘آخرکار اس مغرور اقتدار کے دروازے تک پہنچ ہی گئی ہے۔ یہ ہمارے ان لاکھوں نوجوانوں کی جیت ہے جنہوں نے تعلیمی نظام میں بہتری کے لیے ملک بھر کی سڑکوں پر اپنی آواز اٹھائی۔ یہ سچ کی جیت ہے اور مودی کی ضد کی شکست ہے۔

انہوں نے سوشل میڈیا پلیٹ فارم ایکس پر مزید کہا،’یہ ان تمام خاندانوں کی جیت ہے جنہوں نے اپنے بچوں کو کھو دیا، کیونکہ یہ حکومت بدعنوان ہے۔ یہ متحدہ اپوزیشن کی جیت ہے، جس نے طلبہ کے مفاد میں پارلیامنٹ سے لے کر سڑکوں تک اپنی آواز بلند کی۔‘

کھڑگے نے یہ بھی کہا کہ اب مودی کی باری ہے کہ وہ ہماری نوجوان نسل سے معافی مانگیں اور ان لوگوں کے خلاف سخت کارروائی کریں جنہوں نے ان پر لاٹھیاں اور پیلٹ گن چلائیں۔

وہیں،راشٹریہ جنتا دل (آر جے ڈی) کے رکن پارلیامنٹ منوج کمار جھا نے کہا کہ مودی حکومت کو آج پہلی شکست نوجوانوں کے جوش، ان کے سوال اور جمہوریت کے اس تصور کی وجہ سے ملی ہے جس میں جوابدہی کو خاص مقام حاصل ہے، اور جسے یہ حکومت مسلسل ختم کر رہی تھی۔ آج طلبہ اور نوجوانوں نے اسے دوبارہ حاصل کیا ہے۔

انہوں نے سوشل میڈیا پر جاری ایک ویڈیو پیغام میں کہا،’حالاں کہ یہ بات یہیں ختم نہیں ہوتی، اس کے آگے ایک بہتر نظام قائم کیا جانا چاہیے، جہاں جوابدہی طے ہو، سوال اٹھانے والوں کو اینٹی نیشنل نہ کہا جائے اور جمہوری اقدار سے سمجھوتہ نہ کیا جائے۔‘

عام آدمی پارٹی کے اروند کیجریوال نے کہا کہ حکومت کو عوام کے سامنے جھکنا پڑا۔ انہوں نے ایکس  پر ایک ویڈیو پیغام شیئر کرتے ہوئے لکھا،’دھرمیندر پردھان کے استعفیٰ پر پورے ملک کو مبارکباد۔ جمہوریت کے لیے یہ ایک بڑی جیت ۔‘

وزیر تعلیم کے استعفیٰ ری-پوسٹ کرتے ہوئے ترنمول کانگریس (ٹی ایم سی) کی رکن پارلیامنٹ مہوا موئترا نے فیض احمد فیض کی نظم’لازم ہے کہ ہم بھی دیکھیں گے‘کے ساتھ’جئے ہند‘لکھا۔

این سی پی (شرد پوار گروپ) کے سربراہ شرد پوار نے کہا،’نیٹ پیپر لیک معاملے میں دہلی کے جنتر منتر پر نوجوانوں نے مسلسل 28 دنوں تک جو جدوجہد اور عزم کا مظاہرہ کیا، وہ واقعی قابل تعریف ہے۔ مظاہرین کے مسلسل مطالبے کے بعد مرکزی وزیر تعلیم نے آخرکار آج استعفیٰ دے دیا ہے۔ یہ لڑائی، جو بغیر خوف کے جبر کے خلاف مضبوطی سے کھڑی رہی اور حکومت کو ناانصافی کے خلاف اخلاقی ذمہ داری قبول کرنے پر مجبور کیا، جمہوریت کی طاقت کی علامت ہے۔‘

انہوں نے مزید کہا کہ یہ ملک میں نوجوانوں کے اتحاد کی ایک بڑی جیت ہے۔ ساتھ ہی انہوں نے حزب اختلاف کے تمام ارکان پارلیامنٹ کا بھی دل سے شکریہ ادا کیا جنہوں نے ملک کے نوجوانوں کو اخلاقی اور پارلیامانی حمایت فراہم کی۔

انہوں نے مزید کہا،’میں یقینی طور پر کہنا چاہوں گا کہ ملک میں جمہوریت کی جیت ہوئی ہے، اور اس کا کریڈٹ بلا شبہ ملک کی نوجوان نسل کو جاتا ہے۔‘

ہریانہ کے سابق وزیر اعلیٰ اور کانگریس رہنما بھوپیندر سنگھ ہڈا نے کہا،’دیر آئے درست آئے، اگر پہلے آ جاتے تو یہ نقصان نہ ہوتا۔ نوجوان نسل کا اگزام سے بھروسہ اٹھ چکا ہے، پورا سسٹم بدلناچاہیے اور ایک نیاسسٹم آنا چاہیے۔‘

مرکزی وزیر تعلیم دھرمیندر پردھان کے استعفیٰ کے بعد مرکزی حکومت کی جانب سے پہلا ردعمل مرکزی وزیر کرن رجیجو کی طرف سے آیا۔ انہوں نے سوشل میڈیا پر دھرمیندر پردھان کے دور کی تعریف کی اور تعلیمی اصلاحات میں ان کی خدمات کے لیے ان کا شکریہ ادا کیا۔

کرن رجیجو نے سوشل میڈیا پر لکھا،’حقیقی قیادت کی پہچان دہائیوں کے کام سے ہوتی ہے اور دھرمیندر پردھان جی کی عوامی زندگی اور طلبہ کی فلاح و بہبود کے لیے ان کا عزم اس کا ثبوت ہے۔‘

انہوں نے کہا کہ مرکزی کابینہ میں ان کے ساتھ کام کرتے ہوئے انہوں نے دیکھا کہ دھرمیندر پردھان تعلیمی نظام کو مضبوط بنانے اور ہر فیصلے میں لاکھوں طلبہ کے مفاد کو ترجیح دینے کے لیے مکمل طور پر وقف تھے۔

غور طلب ہے کہ نیٹ-یو جی امتحان کے پیپر لیک ہونے کے معاملے پرکاکروچ جنتا پارٹی 20 جون سے دہلی کے جنتر منتر پر احتجاج کر رہی ہے۔ اس سے پہلے جمعہ (24 جولائی) کو دہلی میں کاکروچ جنتا پارٹی اور مرکزی حکومت کے نمائندوں کے درمیان بات چیت ہوئی تھی۔ یہ بات چیت تقریباً 2 گھنٹے تک جاری رہی، جس میں سی جے پی نے واضح طور پر کہا کہ وہ وزیر تعلیم دھرمیندر پردھان کے استعفیٰ کے مطالبے سے پیچھے نہیں ہٹیں گے۔

مرکزی حکومت کی جانب سے بات چیت میں شامل جے پی نڈا نے صحافیوں کو بتایا تھا کہ وہ سی جے پی کے مطالبے پر غور کرنے کے بعد سنیچر کی دوپہر کے بعد پھر سے بات چیت کریں گے۔

More in Featured :
دہلی: حراست میں لیے گئے طلبہ کی مدد کے لیے پہنچے وکیل کا پولیس پر مارپیٹ کا الزام
سی جے پی نے کہا – اگر ایک دو دن میں دھرمیندر پردھان نے استعفیٰ نہیں دیا تو ملک گیر تحریک کا اعلان کیا جائے گا
نہتے اور ’خطرناک‘ نوجوانوں کی نئی کاکروچ جمہوریت
نئے ہائر ایجوکیشن سکریٹری آخری بار کس وجہ سے سرخیوں میں آئے تھے؟
طلبہ تحریک: جنتر منتر پہنچے خودکشی کرنے والی طالبہ کے اہل خانہ نے کہا – یہ اور کتنے بچوں کی جان لیں گے
طلبہ تحریک: پی ایم کے ویڈیو پر کانگریس صدر بولے – یکطرفہ ’من کی بات‘ نہیں، پارلیامنٹ میں جواب دیں

Related News