پلواما حملے کے بعد وزیراعظم نریندر مودی پر یہ الزام لگا تھا کہ جس وقت یہ حملہ ہوا،تب وہ جم کاربیٹ نیشنل پارک میں شوٹنگ کر رہے تھے۔
فوٹو: بہ شکریہ ڈسکوری چینل
نئی دہلی:ہندوستانی وزیراعظم نریندر مودی مشہور وائلڈ لائف شو،مین ورسیس وائلڈ کے ایک اسپیشل ایپی سوڈ میں دکھائی دیں گے۔ یہ ایپی سوڈ ڈسکوری انڈیا پر 12 اگست کو رات 9 بجے نشر ہوگا۔اس پروگرام کے ہوسٹ بیئرگرلز نے اس ایپی سوڈ کا ایک ویڈیوٹوئٹر پر شیئر کرتے ہوئے یہ جانکاری دی ہے۔
گرلز نے لکھا،’180 ممالک کے لوگوں کو وزیراعظم نریندر مودی کی زندگی کے ان دیکھے پہلوؤں کے بارے میں معلوم ہوگا جب وہ اینیمل کنزرویشن اینڈ انوائرمینٹل چینج کے بارے میں بیداری لانے کے لیے ہندوستانی جنگلات میں جانے کا جوکھم اٹھائیں گے۔’
People across 180 countries will get to see the unknown side of PM @narendramodi as he ventures into Indian wilderness to create awareness about animal conservation & environmental change. Catch Man Vs Wild with PM Modi @DiscoveryIN on August 12 @ 9 pm. #PMModionDiscovery pic.twitter.com/MW2E6aMleE
— Bear Grylls (@BearGrylls) July 29, 2019
ڈسکوری چینل کی طرف سے جاری پریس ریلیز میں وزیراعظم مودی کے حوالے سے کہا گیا ہے کہ اس شو کے ذریعے سے ان کو یہ موقع ملا ہے کہ وہ دنیا کو ہندوستان کی ماحولیاتی وراثت اور ماحولیاتی تحفظ کی اہمیت سمجھا سکیں۔گرلز کے ذریعے شیئر کیے گئے پرومو میں گرلز اور مودی ایک جنگلی ندی کو پار کرنے کے لیے رافٹ بناتے نظر آتے ہیں۔جم کاربیٹ نیشنل پارک میں شوٹ ہوا یہ ایپی سوڈ ہندی اور انگریزی کے علاوہ بنگلہ،تمل اور تیلگو میں نشر ہوگا۔
غور طلب ہے کہ پلواما حملے کے بعد وزیراعظم نریندر مودی پر یہ الزام لگا تھا کہ جس وقت یہ حملہ ہوا،تب وہ جم کاربیٹ نیشنل پارک میں شوٹنگ کر رہے تھے۔اس کے علاوہ مارچ مہینے میں انڈین ایکسپریس کی ایک رپورٹ میں بتایا گیا تھا کہ 14 فروری ،جس دن جموں و کشمیر کے پلواما میں سی آر پی ایف کی ٹکڑی پر حملہ ہوا تھا،کے آس پاس بیئر گرلز اتراکھنڈ کے جم کاربیٹ ٹائیگر ریزرو کے ڈھکالا میں تھے۔
