آئندہ عام انتخابات میں فتح حاصل کرنے کے لیے وزیرا عظم نریندر مودی اور بی جے پی صدر امت شاہ نے تین ایشوز پر مشتمل ایک روڑ میپ ترتیب دیا ہوا ہے۔اس میں اترپردیش کے شہر ایودھیامیں بابری مسجد کی جگہ ایک عالیشان رام مندر کی تعمیر کا ہوا کھڑا کرنا ہے۔
علامتی تصویر / فوٹو : پی ٹی آئی
ہندوستان میں حال ہی میں پانچ صوبائی اسمبلی انتخابات میں جس طرح حکمراں بھارتیہ جنتا پارٹی (بی جے پی) کو ہزیمت کا سامنا کرنا پڑا، اس سے لگتا ہے کہ ابتر ہوتی ہوئی معیشت، کسانوں کی بد حالی اور دو سال قبل نوٹ بندی اور نئے ٹیکس نظام کی وجہ سے تاجر طبقہ کو ہوئی پریشانیوں کی وجہ سے اس کا روایتی ووٹ بینک ٹوٹ گیا ہے۔ اب شاید اگلے چند مہینوں میں کسانوں اور تاجروں کے لیے وزیر اعظم نریندر مودی مراعات کی بارش کردیں گے اور اس کے لئے پارلیامنٹ کا بجٹ اجلاس بھی جنوری کے آخری ہفتہ میں ہی بلانے کی تحویز ہے۔
مگر اندرون خانہ تجزیہ یہی ہے مئی میں ہونے والے عام انتخابات تک اب شاید ہی عام ووٹر تک ان مراعات کا فیض پہنچ پائے گا۔ اس لئے پارٹی لیڈروں کا خیال ہے کہ معیشت کے بجائے جذباتی و قوم پرستانہ ایشوز کی کشتی پر سوار ہوکر عام انتخابات کا پرشور دریا عبور کیا جائے۔ اس سلسلے میں ذرائع کے مطابق فتح حاصل کرنے کے لیے وزیرا عظم نریندر مودی اور ان کے دست راست بی جے پی کے صدر امت شاہ نے تین ایشوز پر مشتمل ایک روڑ میپ ترتیب دیا ہوا ہے۔ اس میں اولین ترجیح اترپردیش کے شہر ایودھیامیں مسمار شدہ بابری مسجد کی جگہ پر ایک عالیشان رام مندر کی تعمیر کا ہوا کھڑا کرنا ہے۔
بی جے پی کے اندر سے ذرائع بتا رہے ہیں کہ پارٹی انتظار میں ہے کہ ہندو انتہا پسندوں کی مربی تنظیم راشٹریہ سیویم سنگھ ( آر ایس ایس) اور اس کی ذیلی تنظیم وشو ہندو پریشد (وی ایچ پی) کس حد تک رام مندر کو اگلے ایک دو ماہ میں ایک عوامی مہم میں تبدیل کرنے میں کامیاب ہوجاتی ہیں۔ دوسرا جموں و کشمیر میں مزید کشت و خون و غیر مستحکم حالات بنائے رکھ کر اس کو ملک بھر میں ووٹ حاصل کرنے کے لیے بھنانا شامل ہے۔ اور اگر یہ دو ایشوزعوامی جذبات ابھارنے میں ناکام ہوتے ہیں ، تو آخری حربہ کے طور پر انتخابات سے قبل پاکستان کے خلاف کسی طرح کی جارحانہ کارروائی کرکے ہندو ووٹروں کو بی جے پی کے حق میں صف بند کرنا، تاکہ دفاعی سودوں اور بینکوں میں ہورہی بد عنوانیوں اور دیگر ایشوز کو لیکر وہ مودی حکومت کو احتساب کے کٹہرے میں کھڑا نہ کرسکیں۔
جنوبی کشمیر کے ضلع
پلوامہ میں جس طرح کی خون کی ہولی کھیلی گئی، اس سے یہی لگتا ہے کہ مودی حکومت نے آخرالذکر روڑ میپ پر کام کرنا شروع کر دیا ہے۔ منصوبہ ہے کہ کشمیریوں اور پاکستان کو زیادہ سے زیادہ مشتعل کرکے کشیدگی کو ہوا دیکر ملٹری آپریشنز کے لیے راہ ہموار کرائی جائے۔پلوامہ میں جس طرح نہتے سویلین افراد کو نشانہ بنایا گیا او ر ان کے سینوں اور سر وں میں گولیاں داغ دی گئی ، کسی بھی مہذ ب اور جمہوری معاشرہ کا خاصہ نہیں ہوسکتا ہے۔ مہلوکین میں آٹھویں کلاس کا طالبعلم، شیر خوار بچے کے لیے دودھ خریدنے کی تگ و دو میں راستے میں کھڑا باپ، ایک دوکاندار، پریکٹس سے واپس آرہا ایک کھلاڑی اور کئی راہگیر شامل تھے۔
مقامی لوگوں کے مطابق پلوامہ کے ایک د یہات سرنو میں صبح ساڑھے 8بجے کے قریب فوج اور عسکریت پسندو ں کے درمیان تصادم ختم ہوگیا تھا ۔ گو کہ لوگ سڑکوں پر تھے، مگر پر تشدد مظاہرے نہیں ہو رہے تھے۔بتایا جاتا ہے کہ جب فورسز کی ٹکڑی آپریشن ختم کرکے واپس جارہی تھی کہ کھار پورہ محلہ میں تنگ راستہ کی وجہ سے ان کی بھاری بھرکم کیسپر گاڑی کو موڑ کرنے میں مشکل پیش آرہی تھی۔ عوام کو سڑکوں سے ہٹانے اور راستہ بنانے کے لیے فورسز اہلکاروں نے بندوقوں کے دہانے کھول دیئے ۔ دیکھتے ہی دیکھتے پیدل چل رہے افراد زمین پر گرتے گئے۔
پلوامہ انکاؤنٹر میں مارے گئے عام شہریوں کے آخری سفر میں شامل لوگ(فوٹو: پی ٹی آئی)
اسی طرح کی صورت حال پلوامہ سٹیڈیم کے پیچھے بر پورہ میں بھی پیش آئی اور وہاں بھی فورسز کی ایک گاڑ ی پھنس کر رہ گئی تھی۔یہاں بھی فورسز نے بندوقوں کے دہانے کھول کر اندھا دھند فائرنگ کی ۔ مہلوکین میں انڈونیشیا سے ایم بی اے ڈگری یافتہ عابد حسین لون بھی شامل ہے ، وہ حال ہی میں اپنی انڈونیشین اہلیہ اور شیر خوار بچے کے ساتھ کشمیر منتقل ہو گیا تھا ۔ آٹھویں جماعت کے طالب علم عاقب بشیر کا والد اسپتال میں تو زخمیوں کو دیکھنے گیا تھا کہ اسے اپنے لخت جگر کی ہلاکت کی اطلاع ملی۔ وہ ضلع اسپتال پلوامہ سے گزر رہا تھا جس دوران ان کے دل میں خیال آیا کہ ضلع اسپتال میں زخمیوں کی عیادت اور خون کا عطیہ کروں۔ اسپتال میں اس کو بتایا گیا کہ ایک غیر شناخت شدہ بچے کی لاش پڑی ہے ، جس کی ابھی تک شناخت نہیں ہوسکی ہے ۔ معلوم ہوا کہ یہ تو اسی کے 14سالہ لخت جگر کی لاش ہے۔
شمالی آئر لینڈ، عراق، افغانستان ، کوریا و فلسطین کا دورہ کرنے اور ان تنازعات کا مشاہد ہ کرنے کے بعد میرا خیال ہے کہ دنیا کے دیگر جنگ زدہ خطوں کے برعکس عالمی میڈیا نے بڑی حد تک کشمیرکو نظر اندازکیا ہے۔ حال ہی میں استبنول میں فلسطین پر ہوئی بین الاقوامی میڈیا کانفرنس کے متعدد سیشنز میں جب شورش زدہ خطوں میں رپورٹنگ کے حوالے سے میں اپنے تجربات بیان کر رہا تھا، کسی کو یقین ہی نہیں ہورہا تھا۔کئی دہائیوں سے فلسطین و مغربی ایشا کے دیگر تنازعات کو کور کرنے والے معروف صحافی اور قلم کار جونانتھن اسٹیل حیران تھے، کہ وہ کیسے ان واقعات سے نابلد ہیں۔
وہ بعد میں استفسار کر رہے تھے کہ نئی دہلی میں مقیم بین الاقوامی میڈیا ان واقعات کا نوٹس کیوں نہیں لیتا ہے؟ جب میں نے ان سے کہا کہ بین الاقوامی میڈیا کو کشمیر جانے کے لیے سرکاری اجازت کی ضرورت ہوتی ہے تو متعدد دیگر صحافیوں نے بھی کہا، کہ اس طرح کی کسی پابندی کا سامنا انکو فلسطن کے مقبوضہ علاقوں میں کبھی نہیں کرنا پڑا ہے۔ کشمیر پر اگر رپورٹنگ ہوئی بھی ہے تو بھی دور دراز علاقوں تک رسائی نہ ہوسکی ہے۔ حتیٰ کہ سرینگر کا مقامی میڈیا بھی بیشتر علاقوں میں جانے سے قاصر ہے۔ چند برس قبل ہندوستان کے ایک معروف کالم نویس اور قانون دان اے جی نورانی کے ہمراہ میں نے شمالی کشمیر میں لنگیٹ تحصیل کے ایک خوبصورت مقام ریشی واری کا دورہ کیا تھا۔
سرسبز جنگلوں اور پہاڑی نالوں سے پْر اس وادی میں داخل ہوتے ہی تقریباً 30 کلومیٹر تک سڑک سے ملحق سبھی گھروں کی دوسری منزل پر ہمیں فوجی جوان نظر آئے۔ معلوم ہوا کہ گھروں کے مکین تو پہلی منزل پر رہتے ہیں اور دوسر ی منزل فوج کے لئے مخصوص ہے۔ یہاں گاؤں والوں نے پہلی بار میڈیا سے وابستہ افراد کو دیکھا تھا۔ اسی طرح اگر سرینگر کے شیرِکشمیر انسٹی ٹیوٹ آف میڈیکل سائنسزکے آرکائیوزکو کھنگالا جائے تو ایسے ہوشربا کیسز کی تفصیلات ملے گی، جو بقول کئی ڈاکٹروں کے میڈیکل ہسٹری میں آخری بار صرف جنگ عظیم دوم کے دوران جرمن انٹیلی جنس کے ادارے گسٹاپو کے انٹروگیشن سنٹروں میں رپورٹ ہوئے ہیں۔کشمیر میں میں پیلٹ لگنے سے زخمی ہونے والے افراد کی آنکھیں بچانے میں مصروف باہر سے آئے ڈاکٹر تک ذہنی تناؤ کا شکار ہوگئے کیونکہ ان کے بقول انہوں نے اپنے پورے کیریئر میں ایسی جنگ زدہ صورتحال کبھی نہیں دیکھی تھی۔
قوم پرستی کے خمار میں ڈوبے وزیر اعظم اور حکومت کے دیگر لیڈروں کے رویے سے ظاہر ہے کہ وہ کشمیری عوام اور پاکستان تک پیغام پہنچانا چاہ رہے ہیں کہ ان کی منزل نا قابل حصول ہے اور کسی بیرونی دباؤ کی عدم موجودگی میں ریاست کا وسیع دائرہ بالآخر تحریک کشمیر کو تحلیل کردے گا۔ اور ان کو یقین ہے کہ انتخابات میں یہ طریقہ کار ان کو فائدہ پہنچائے گا۔ اپنے تازہ بیان میں فوج کے سربراہ جنرل بپن راوت نے کہا کہ فوج کشمیر میں ڈرون حملے کرسکتی ہے لیکن شرط یہ ہے کہ لوگ اجتماعی نقصان (collateral damage) کے لیے تیار ہوں ‘‘۔وہ یہ شاید کہنے کی پوزیشن میں نہیں ہیں کہ کشمیر میں فوج کا مقابلہ کسی باضابطہ منظم عسکری گروہ سے نہیں بلکہ ناراض نوجوانوں اور عوام کے ساتھ ہے۔
مجھے یاد ہے کہ 2010ء میں کشمیر ایسی ہی صورت حال دوچار تھی کہ اس دوران ہندوستان کے سینئر صحافیوں کے ہمراہ مجھے اسرائیل اور فلسطین کے دورے کا موقع ملا۔ تل ابیب میں اسرائیلی وزیر اعظم کے مشیر ڈیوڈ رائزنر بریفنگ دے رہے تھے۔ وہ اسرائیلی فوج میں اہم عہدیدار رہ چکے تھے، لبنان کی جنگ میں ایک بریگیڈ کی کمان بھی کی تھی، اس کے علاوہ انتفاضہ کے دوران بھی فوج اور پولیس میں اہم عہدوں پر براجمان رہے تھے۔ اس اسرائیلی افسر نے ہندوستانی صحافیوں کو ششدر اور رنجیدہ کردیا جب اس نے کشمیر میں تعینات ہندوستانی فوج کے افسروں کے ”کارنامے‘‘ سنانے شروع کئے۔ اس نے کہا، ہندوستانی افسر اس بات پر حیران ہو جاتے ہیں کہ شورش زدہ علاقوں میں مسلح اور غیر مسلح کی تفریق کیوں کی جائے؟
انہوں نے کہا کہ حال ہی میں اسرائیل کے دورے پر آئے ہوئے ایک ہندوستانی جنرل نے ان کو بتایا کہ کشمیر میں وہ پوری آبادی کوگھیرکرگھروں میں گھس کر تلاشیاں کرتے ہیں کیونکہ ان کے لئے کشمیرکا ہر دروازہ دہشت گردکی پناہ گاہ ہے۔ اس واقعے کو بیان کرنے کا مقصد کسی بھی طور پر اسرائیلی جرائم کا دفاع کرنا نہیں بلکہ صرف یہ باورکرانا ہے کہ کشمیرکس حد تک عالمی ذرائع ابلاغ میں اور سفارتی سطح پر انڈر رپورٹنگ کا شکار رہا ہے اور مظالم کی تشہیرکس قدر کم ہوئی ہے۔ رائزنرنے جنرل کا نام تو نہیں لیا مگر کہا کہ ہم نے ہندوستانی فوجی وفد کو مشورہ دیا کہ عسکری اور غیر عسکری میں تفریق نہ کرکے وہ کشمیر میں صورت حال کو پیچیدہ بنا رہے ہیں۔
اس خطے میں پلوامہ جیسی بہت سی کہانیاں منظر عام پر آنے کے لئے تفتیشی صحافیوں اور مصنفین کی منتظر ہیں۔ ان داستانوں کی محض ایک جھلک بالی ووڈ کی فلم حیدر میں اور ایڈرین لیوی اورکیتھی اسکاٹ کی کتاب ”دی میڈوز‘‘ میں ملے گی۔ کشمیر پر چار صدیوں سے زائد طاقت اور خوف کے ذریعے حکومت کی جا رہی ہے۔خوف کی نفسیات بڑی حد تک ختم ہوچکی ہے؛ تاہم طاقت کا زور اب بھی باقی ہے۔یہاں کہیں امن و سکون نہیں مگراس کے باوجود اہل کشمیر آلام و مشکلات کی شدت برداشت کر کے بھی حالات کے سامنے سپر انداز ہونے کو تیار نہیں۔
شاید اسی حقیقت کا اظہار بارہویں صدی کے مشہور مؤرخ کلہن پنڈت نے کیا تھاکہ اہل کشمیرکو محض زور بازو سے زیر نہیں کیا جاسکتا۔ اگلے مالی سال کے دوران تعمیر و ترقی و سرکاری تنخواہوں کے نام پر حکومت جموں و کشمیر میں 88911کروڑ روپے صرف کررہی ہے۔ہندوستانی حکومت کے سالانہ3.5لاکھ کروڑ روپے کے دفاعی بجٹ کا نصف یعنی تقریباً 1.7 لاکھ کروڑ روپے بھی کشمیر میں ہی خرچ ہوتا ہے۔ اگر اس حساب کو جوڑا جائے تو ایک اندازہ کے مطابق ہندوستانی حکومت کشمیر پر اپنے قبضہ کو برقرار رکھنے کے لیے روزانہ 737 کروڑ یعنی سات بلین روپے خرچ کرتی ہے۔کیا ہی اچھا ہوتا کہ ہندوستانی ٹیکس دہندہ کی یہ خون پسینہ کی کمائی کسی مثبت اور تعمیری مد میں خرچ ہوتی ،جس سے جنوبی ایشیا میں غربت کا خاتمہ ہوتا اور اقوام عالم میں اس خطے کو ایک اقتصادی طاقت کا درجہ دلایا جاسکتا تھا۔
ورنہ کشمیر میں ترقی کے نام پر فنڈ فراہم کرنا ایسا ہی ہے جیسے کسی جیل کا بجٹ بنانا۔ جیلر بھی قیدیوں کے کھانے پینے کا خیال تو رکھتا ہی ہے ۔ وہ کتنا ہی نرم دل کیوں نہ ہو ، اسکا اور قیدیوں کے درمیان ایک تناو کا رشتہ ہی رہتا ہی ہے۔ اگر اب بھی حکومتیں اس نکتہ کو سمجھنے سے قاصر رہیں گی تو یہ خطہ بد ترین عدم استحکام کا شکار ہو جائے گا۔ مسئلہ کشمیرکو حل کرنے کے لئے سنجیدہ ہونا پڑے گا۔ اس کے لئے جمہوریت، رحم دلی اور مفاہمت پر مبنی ایک ماحول تیار کرنا ہوگا۔
The post
کشمیر میں ترقی کے نام پر فنڈ فراہم کرنا مطلب کسی جیل کا بجٹ بنانا ہے appeared first on
The Wire - Urdu.
